Aminado ang sugar industry leaders sa Negros Occidental nga kinahanglan sang ligwa si President Ferdinand ‘Bongbong’ Marcos agud nga matumod kag masolbar sini ang mga problema sa sektor sang agrikultura.
Sa interview sang Bombo Radyo kay Manuel Lamata, presidente sang United Sugar Producers Federation, aminado ini nga indi mamagic ukon indi masolbar ni Presidente Marcos ang dalagko nga mga problema sa malip-ot nga tinion bisan siya pa ang mapungko bilang tiglikom sang Department of Agriculture.
Sa sektor sang agrikultura, mahimo suno kay Lamata nga masolbar ang mga problema sa sulod sang duha tubtub tatlo ka tuig ilabi na sa self-sufficiency.
Ini ang kaangay na gid lamang sa problema sa kalamay bangud isa ka tuig antes makaharvest sang tubo.
Apang bangud siya ang magapungko nga secretary sang DA, matumod gilayon ni Marcos ang matuod nga problema kag makapangayo sang pondo nga kinahanglanon.
Subong nga bag-o lang nakapungko si Marcos, kinahanglan suno kay Lamata nga hatagan ini sang ligwa agud nga makatumod sang mga problema nga dapat solusyunan.
Iya man ginalantaw nga bukas si Marcos para sa diskusyon sa mga leader sang agricultural groups.
Nagalaom naman ang sugar industry leaders nga taga-Negros Occidental ang ibutang nga administrator sang Sugar Regulatory Administration bangud makaintindi ini sang matuod nga sitwasyon sang sugar industry.
