Gin-athag sang anay administrator sang Sugar Regulatory Administration (SRA) nga mahimo nga mag-issue liwat sang sugar order apisar nga may yara sang ginpagwa nga napirmahan na agud si President Bongbong Marcos nga nagaserbe bilang concurrent Agriculture secretary ang magapirma.
Suno kay Rafael Coscolluela, mahimo nga mag-issue liwat sang sugar order ang Sugar Board kag pirmahan sang presidente bilang chairman agud nga wala sang madamo nga gamo.
Suno kay Coscolluela, mahimo nga sundon kag iprint lang liwat ang ginpagwa nga Sugar Order No. 4ukon irevise santo sa gusto sang presidente.
Suno kay Coscolluela, ginpadako lang ang gamay nga bagay nga mahimo lang man kuntani maistoryahan.
Ginalantaw man sini nga ginhungod nga padakuon ang problema agud nga mapahalin sa pwesto si SRA Administrator Hermenigildo Serafica kag iban pa nga miyembro sang board.
Gin-aligar man sini nga mahimo nga may hidden agenda nga nagaandar sa Sugar Order No. 4.
Nagpanawagan man ini nga dapat nga iconvene man sang presidente ang Sugar Board agud makita ang matuod nga problema sa kalamay.
