Ginatinguhaan sang Sugar Regulatory Administration nga makahimo sang natural nga paagi sa pagpatay sang red-striped soft-scale insect (RSSI) nga nagapanghalit sa katubuhan.
Sa pahayag ni SRA Director Paul Azcona, narecover na nila ang masobra 200 hectares sang katubuhan nga malala nga nahalitan sang RSSI.
Suno diri, apisar nga masobra 2,200 hectares ang recorded nga apektado, indi bilog nga kakampuhan ang may insekto, kag porsyon lamang sa mga ini ang severely damaged.
Aminado si Azcona nga naga-epekto ang chemical pesticide, apang sa masami kun sila ang magspray, nagasaylo lamang sa lain nga area ang RSSI, kag nagabalik man kun magtahaw na ang hilo.
Gani, ginatinguhaan sa karun nga makahimo sang natural solution.
Suno kay Azcona, may mga ginabreed na nga insekto nga magaserbe nga natural predator sang RSSI.
Target sang mga ini nga kun may mga RSSI incident pa sa palaabuton, ini ang mangin kaangay na lamang sang common colds sa mga tawo, nga mahapos na lamang masolusyonan.
Kalakip sa effort sang SRA, amo ang pagpugong sang pagtransfer sang RSSI sa iban nga mga lugar partikular na sa Bukidnon, nga dako ang ginsaka sa produksyon.
Suno diri, may truck sang tubo nga magadeliver kuntani sang patdan sa Bukidnon gikan sa Negros Occidental, nga ila ginbalabagan.
Cooperative naman ang driver kag nagsugot nga sunugon ang mga karga nga patdan inkaso magpositibo sa RSSI.
Gintsek naman nila ang source nga ginkuhaan, kag wala man sang RSSI infestation, samtang ginspray man nila sang insecticide ang patdan. Samtang, ginpasalig sang Sugar Regulatory Administration nga wala sang mangin pagsaka sa presyo sang kalamay apisar sa halit sang red-striped soft-scale insect (RSSI) sa sugar industry.
Sa pahayag ni SRA Director Paul Azcona, may ara sang nagakaigo nga supply sang kalamay sa Pilipinas tubtob na sa katapusan sang tuig.
Dugang pa sini nga mangin estable man ang farmgate price.
Gani makasalig nga wala sang mangin pagsaka sa presyo sang kalamay, sa baylo, ginpahayag sini nga may-ara na sang pagnubo sa presyo.
