Plano sang Sugar Regulatory Administration (SRA) nga magpatuman sang clearance fee sa pag-import sang sweeteners kaangay sang glucose kag fructose agud mamonitor ang pagpasulod sang raw sugar.
Suno kay SRA administrator kag CEO Pablo Luis Azcona, naka-set sa masunod nga bulan ang pagperma sang SRA board sang order nga magarequire sang import clearance fee gikan sa mga importer sang sweeteners antes pahanugotan nga marelease ang ila shipment sa port.
Suno diri, nadiskusyonan na ini sang SRA board nga gin-agreehan sang mga miyembro.
Ang proposed import clearance fee ang yara sa P10 per 50-kilogram bag.
Dugang pa sini, ini makabulig sa SRA para mamonitor kun ano kadako sang volume ang gina-import sa pungsod samtang ginpa-athag man sini nga ang charge sa import clearance fee ang minimal lamang.
