Ginkumpirmar ni House Secretary General Reginald Velasco nga nabatun na sang House Committee on Ethics and Privileges ang letter gikan kay Pamplona, Negros Oriental Mayor Janice Degamo, nga nagahingyo sa House of Representatives nga i-expel si suspended Negros Oriental Representative Arnolfo Teves Jr.
Ang letter ang nabatun sang Ethics Committee alas-7:18 kahapon sang aga.
Suno kay Velasco, ginpasa nila ini sa committee in charge nga Committee on Ethics kag sila na ang magadesider kun ano ang himuon sa petisyon bangod sila ang may jurisdiction natuhoy diri.
Sa karon, yara sa recess ang Kongreso, apang mahimo gihapon nga mapadayun sang komitiba ang trabaho.
Paathag ni Velasco nga mahimo magsapol ang Committee on Ethics agud ikonsiderar ang petition letter ni Mayor Degamo.
Ginpahayag pa sang secretary general nga ang Ethics Committee ang mahimo man nga magsumiter sang ila nga findings kag rekomendasyon sa tion nga magbalik na ang session sa Mayo 8.
Madumduman nga si Congressman Teves ang gintudlo sang pila sa mga suspetsado sa pagpatay kay Negros Oriental Governor Roel Degamo, bilang mastermind sa krimen.
Ginpanginwala naman ni Teves nga may kaangtanan ini sa krimen apang wala na ini nagpauli sa Pilipinas gikan sa iya nga overseas trip, bangod sa kahangawa para sa iya nga seguridad.
Tinalikdan nga semana, nagboto ang Kamara unanimously para sa suspension ni Congressman Teves sang 60 ka adlaw bangod sa indi pagtambong sa mga House proceedings.
Paathag naman ni Velasco, nga wala sang epekto ang petition letter ni Degamo sa suspensyon ni Teves bangod ini ang nadesisyunan na sang Committee on Ethics kag sang plenaryo sang Marso 22.
Ang suspensyon ni Teves ang indi man maka-apekto sa mga serbisyo nga ginahatag sa iya nga mga constituents, kag mahimo nga mag-appoint sang caretaker sa distrito ni Teves.
