Ginpahayag sang pinuno sang Bacolod Traffic Authority Office nga ginpirmahan na ni Bacolod City Mayor Alfredo “Albee” Benitez ang sulat agud nga ipadala sa Metropolitan Manila Development Authority (MMDA) officers agud nga magpatigayon sang seminar para sa mga BTAO leader officers.
Sa interview sang Bombo Radyo Bacolod kay Patrick Leonard Lacson, wala pa sang exact date kun san-o ang mga ini magasugod bangud indi man sini luyag nga ipressure ang opisyal sang MMDA bangud nakahibalo siya nga mga masako man ini.
Suno kay Lacson, tubtob sa karun ginahulat pa sini ang sabat nagikan sa MMDA bangud nakadepende man sa availability sang nasambit nga ahensya ang paghatag sang katumanan sang requests sang BTAO.
Dugang pa ni Lacson ang traffic academy indi lang ini para sa mga traffic officers kundi para man sa tanan agud nga may ihibalo sa mga traffic rules kag dapat nga himuon sang mga motorista sa dalanon.
Sang tinalikdan nga adlaw nagpatawan man ini sang general meeting kaupod man sang mga BTAO officers kag personnel kun sa diin pormal na siya nga nagpakilala bilang bag-o nga pinuno sang nasambit nga departmento kag mga plano sini.
Suno kay Lacson, gin-athag sini sa mga BTAO personnel nga luyag niya malab-ot ang zero corruption kag ginpahayag man kun paano sini masuguran.
Suno diri, ginpangabay man sini sa ila nga paghinun-anon nga likawan ang tentasyon a kwarta kag ini dapat ang magasugod sa kaugalingon sang kada isa kag paagi diri malab-ot ang tinutuyo nga zero corruption sa ila nga departmento.
Ginpahayag man ni Lacson nga kun sumahon ang kwarta nga ginatanyag sa iya bilang bayad sang mga traffic rules violators mahimo na ini nga magadangat sa P1.4-P1.5 million apang gintindugan sini ang iya prinsipyo kag ginahimo lamang ang nagakadapat sa iya trabaho.
