Ginsumiter na ni Bacolod City Administrator Em Ang ang sulat sang grupo sang mga doctor sa Regional Inter-Agency Task Force (RIATF) nga nagarekomendar nga ipaidalom sa liwat sa Enhanced Community Quarantine (ECQ) ang syudad bangud sa nagasaka nga kaso sang Covid-19.
Madumduman nga ginpahayag ni Vice Mayor El Cid Familiaran nga nakasaad sa sulat sang grupo sang mga doktor ang ila nga concern ilabi na sa nagasaka nga kaso sang coronavirus kun sa diin ang Bacolod ang nagapanguna sa Western Visayas sa may pinakamadamo nga indigenous cases.
Ila man ginhatagan-pagtamod ang mga ospital nga nagdeklarar nga yara na sila sa full capacity kag ila man gin-ako nga ginakapoy na sila.
Sa interview sang Bombo Radyo Bacolod kay City Administrator Em Ang, ginpahayag sini nga wala na sa posisyon ang syudad sang Bacolod nga magdeklarar sang quarantine status gani kinahanglan nga maghingyo sa National IATF para sa deklarasyon sang Covid-19.
Suno kay Ang, ang mga rekomendasyon sang Regional IATF ang ginahimo na nga daan sang syudad.
Nahibaluan nga gindiskusyunan man ni Mayor Evelio “Bing”Leonardia kag iban pa nga city officials kaupod si Department of Health Region 6 Director Marlyn Convocar agud diskusyunan ang angot sa sulat.
Nagtambong man sa diskusyon si Negros Occidental Governor Eugenio Jose Lacson, Office of the Civil Defense regional director Jose Roberto Nuñez, Department of the Interior and Local Government regional director Juan Jovian Ingeniero kag iban pa.
Apang ginpahayag man ni Ang nga nagapamatok ang mga negosyante sa pagbalik sa ECQ bangud sa epekto sa ekonomiya.
Suno sa DILG, may mga paramaters nga ginakonsiderar antes ideklarar ang local government sa idalom sa ECQ status.
Luyag lamang sang NIATF nga balansehon ang health concerns kag ekonomiya gani ang ginahingyo nga ECQ ang magadepende sa evaluation sang NIATF.
