Gina-alegar nga ginmolestyahan sang isa ka miyembro sang Philippine Army ang 17-anyos nga special child sa Purok Saylan, Barangay 4 ciudad sang Bacolod kahapon.
Sa interview sang Bombo Radyo Bacolod sa isa sa mga naka-rescue sa bata, ginpahayag sini nga ginpangita nila kahapon sang hapon ang biktima upod ang iloy sini tubtob nakit-an nila ang isa ka van nga naka-park sa 17th St.
Suno diri, ginlili niya ang van kag didto niya nakita ang suspetsado nga si Deo Balangen, 32-anyos nga tumandok sang Benguet upod ang biktima.
Nakit-an sini nga nagakay-o sang jumper ang bata apang suno kay Balangen nga nag-istoryahanay lamang sila sa sulod sang van.
Gilayon naman ini nga nagpangayo sang bulig sa kapulisan Suno naman kay Police Major Sherlock Gabana, hepe sang Police Station 2, nagagwa sa ila nga pagpangusisa sa biktima nga pwersa ini nga ginpasakay sa van ni Balangen kag gin-molestyahan.
Suno kay Gabana, desidido nga magpasaka sang kaso nga rape ang pamilya sang biktima apisar pa nga wala sang penetration nga natabo apang natandog sini ang kinatawo sang bata.
Nakuha man sa possession sang suspetsado ang isa ka 9mm pistol.
Positibo naman nga ginkumpirmar ni Army Capt. Cenon Pancito, spokesperson sang 3rd Infantry Division, nga may yara sang Deo Balangen nga miyembro sang Philippine Army.
Santo sa ila imbestigasyon, wala naka-report sa bag-o sini nga unit sa 12th Infantry Battalion si Balangen sang Disyembre 1.
Ginsiguro man ni Pancito nga wala nila ginatolerar ang mga malain nga buluhaton sang mga miyembro sang militar.
