Gina-alegar nga nag-utas sang kabuhi ang isa ka suldado nga katabo sang 47th Infantry Battalion sa sulod mismo sang iya kubo sa Barangay Tambo, Ayungon, Negros Oriental.
Sa interview sang Bombo Radyo Bacolod kay Col. Erwin Rommel Lamzon, Public Affairs Office head sang 3rd Infantry Division sang Philippine Army, ang biktima ang wala anay ginhingadlan apang ini ang naga-edad sang 26 anyos kag may ranggo nga Private First Class sa idalom sang Alpha Company sang 47th Infantry Battalion.
Siya ang anom ka tuig nga nangin Citizen Armed Force Geographical Unit (CAFGU) Active Auxillary antes nagtaas ang ranggo kag nangin Private First Class.
Ang suldado ang suguon kuntani nga mag-upod sa officer sa patigayunon nga meeting sa ciudad sang Kabankalan sang Hunyo 26.
Una nga nagtsekyar ang isa ka sarhento sa kubo agud kuntani ini ang pukawon apang bangod madulom kag nahimos naman ang tululugan, nagpinsar ang sarhento nga nagpaligo ukon may ginkadtuan lamang ang biktima.
Ini ang liwat nga ginkadtuan sang isa pa ka suldado alas-5:30 sang aga, kag didto na ini nasapwan nga duguon nga nagahamyangon sa duta.
Gintinguhaan pa ini nga marevive apang ginbawian gid sang kabuhi.
Ginalantaw ang posibilidad nga ini ang nag-utas sang kabuhi bangod sa depression.
Gingamit sa krimen ang iya man mismo nga service firearms nga ginalantaw gin-um-om sang biktima bangod ini ang may pilas sa bibig lapos sa ulo.
Ang biktima ang may-ara man sang video nga nagahilibion antes pa matabo ang insidente.
Nahibaluan nga masami sila nga naga-away sang iya live-in partner bangod sa pinansyal ukon sustinto ilabi na nga sila ang may isa ka bata, kag ini ang nalumos man sa utang, nga ginalantaw rasun sa iya pag-utas sang kabuhi.
