Nakahunong na sa Sipalay City Police Station ang suldado nga nagluthang-patay sa isa man ka suldado sa sulod sang military detachment sa Brgy Manlucahoc, ciudad sang Sipalay, Negros Occidental, kagab-i, alas- 9:00 sang gab-i.
Ang biktima ang ginkilala nga si Corporal Arnold Sumaribos samtang ang suspek naman amo si Sergeant Charlemagne Nabejet.
Sa interview sang Bombo Radyo kay PLt Col Reynante Jomocan, hepe sang Sipalay City Police Station, alas- 10:00 sang gab-i na sang nareport sa ila ang nagluntad nga shooting incident.
Suno diri, nag-inom inom ang mga kasuldadohan kasunod sa kaadlawan sang isa sa ila nga miyembro.
May nagluntad nga komosyon kun sa diin nahimo pa sang duha nga maglab-otanay kag gilayon nga nagkuha sang 9mm pistol si Nabejet kag gintiro si Sumaribos sa nawala nga bahin sang dughan.
Apisar nga may yara man sila sang kaupod sa sulod sang military detachment, wala na nahingagaw pa nga matambagan ang duha bangod nga madasig ang natabo.
Boluntaryo naman nga nag-upod si Nabejet sa mga kapulisan nga sa karun nakahunong na.
