Ginpasidunggan sang Armed Forces of the Philippines (AFP) ang mga suldado nga nasamaran matapos nga gin-ambush sa Sumisip, Basilan sang Miyerkules, Enero 22.
Ginhatagan ni AFP Chief of Staff General Romeo Brawner Jr. sang Wounded Personnel Medal ang mga suldado bilang pagkilala sang ila nga kaisog kag pagkabaganihan./
Sa pagbisita sang AFP Chief of Staff sa Western Mindanao Command, gindayaw man ni Brawner ang dedikasyon kag serbisyo sang mga katapo sang militar kag nagpasalig nga hatagan sila kag ang ila pamilya sang access sa medical care kag assistance para sa madasig nga recovery.
Suno kay Presidential Peace Adviser Carlito Galvez Jr., natabo ang engkwentro sang naghatag sang security ang mga tropa halin sa 32nd Infantry Battalion para sa mga personnel sang United Nations Development Programme (UNDP) nga involved sa peace and development project sa Barangay Lower Cabengbeng, Sumisip, Basilan.
Ang lawless elements nga nag-atake ang ginpahayag nga suportado sang mga miyembro sang Moro Islamic Liberation Front (MILF).
Duha ka gunmen ang nalakip sa gin-report nga napatay.
Ginsunog man sang nag-ambush ang isa ka KM450 military vehicle nga amo ang ginasakyan sang tropa.
Sa report sang Philippine Army 101st Infantry Brigade, ginpahayag nga apat ang patay sa ambush kalakip ang duha ka suldado samtang 12 naman ang pilason.
