Gindeklarar nga dead on arrival sa ospital ang isa ka suldado matapos gintiro ang kaugalingon gamit ang issued service firearms samtang patay man ang asawa sini matapos ginbuno sang iya ugangan sa Purok Tilapia, Barangay 3, Bacolod City, kahapon sang hapon, Hulyo 12.
Ginkilala ang biktima kay Erwin Pendon, 31 anyos kag active member sang 11th Infantry Battalion sang Philippine Army samtang asawa naman amo si Leonora Pendon, 26 anyos kag lunsay mga residente sang nasambit nga lugar.
Ang amay sang suldado amo si Edwin Pendon, 52 anyos kag residente man sang Purok Tilapia, Barangay 3, Bacolod City.
Sa interview sang Bombo Radyo Bacolod kay Police Lieutenant Conan Gadayan, Station Commander sang Bacolod City Police Station 2, duha ka insidente ang natabo nga ginlakipan sang shooting kag stabbing incident.
Suno kay Gadayan, antes ang shooting incident nag-away ang mag-asawa kag sa ila imbestigasyon naggabot sang pusil nga Glock 17 pistol ang suldado kag ginpalupok sa pader antes man gintiro ang kaugalingon.
Bangud sini nakita sang amay nga si Edwin ang natabo ginbuno naman sini ang asawa nga si Leonor.
Negatibo man sa gunshot wound ang asawa.
Gindala pa sa ospital apang lunsay gindeklarar nga dead on arrival.
Narekober sang mga imbestigador sa crime scene ang isa ka Glock 17 pistol nga amo ang service firearm sang army personnel.
Sa karun nakahunong naman sa Police Station si Edwin kag ang pangatubangon nga kaso amo ang homicide.
