Ginkumpirmar sang commander sang 303rd Infrantry Brigade sang Philippine Army nga may isa ka suldado gikan sa 94th Infantry Batallion nga nag-angkon sang injury sa nagluntad nga engkwentro batok sa New People’s Army (NPA) sa Barangay Buenavista, Himamaylan City Miyerkules sang aga.
Suno kay Brig. Gen. Inocencio Pasaporte, nagpatigayon sang operasyon sa lugar ang 94th IB upod sa Reconnaisance Company matapos nga makabaton sang impormasyon gikan sa pumuluyo nga may presensya sang makawala nga grupo sa lugar.
Ang engkwentro ang nagluntad alas-9:45 sang aga kahapon kun sa diin masobra 10 ka mga NPA member ang ila nga naka-engkwentro.
Suno kay Pasaporte, madasig man nga nag-atras ang makawala nga grupo, samtang nagpadayun naman sa paglagas ang mga militar.
Samtang nagapatigayon sang manuevre, isa ka suldado ang nakaangkon sang injury sa kamot nga gilayon naman nga gin-evacuate pinaagi sa nakastandby nga chopper agud mahatagan sang nagakaigo nga atensyon medikal.
Ginapakamaayo naman ni Pasaporte nga minor lang ang injury sang suldado.
Nagapadayun naman ang tracking sang 94th IB bangod nagapati ang mga ini nga yara lang sa lugar ang mga NPA.
Ginpahayag man sini nga may nakita nga tulo sang dugo ang mga militar apang indi pa matumod kun may nasamaran ukon napatay sa makawala nga grupo.
Suno kay Pasaporte, banglid na nga lugar ang gintabuan sang engkwentro kag nagapadayun sa gihapon ang pursuit operation sang mga militar sa nasambit nga rebelde.
