Padayon pa ang imbestigasyon sang Kabankalan City Police Station may kaangtanan sa pag-ambush patay sa 38 anyos nga lalaki kahapon sang hapon.
Sa interview sang Bombo Radyo Bacolod kay Police Lieutenant Col. Jonel Guadalupe, hepe sang Kabankalan City Police Station, ang biktima nga si John Paul Sola sang Brgy. Talubangi ang gintiro sa Sta. Isabel, Brgy. Kamansi.
Gasakay sa owner type jeep ang biktima sang gin-ambush sang mga suspetsado samtang nagalabay sa taytay pasado alas 5:00 sang hapon.
Bangud sa madamo nga pilas sa nagkalain-lain nga bahin sang lawas, gilayon nga ginbawian sang kabuhi si Sola.
Narecover sa crime scene ang mga basiyo sang .45 calibre pistol kag 9 mm pistol.
Suno kay Guadalupe, wala sang getaway vehicle ang mga suspetsado kundi nagalakat lang sang sila ang nagpalagyo.
Sa karun, madamo sang anggulo nga ginalantaw sang pulis nga motibo sa krimen kag isa na diri ang may kaangtanan sa negosyo sang pamilya Sola.
May nakuha naman nga mga testigo ang mga pulis nga makabulig sa imbestigasyon.
