Ginpanginwala sang presidente sang Sum-ag-Tabuanan-Abunan-Dulao-Tricycle Operators and Drivers Association Incorporated (STAD-TODAI) ang ginareklamo nga nagakarga sang sobra sa tatlo ka mga pasahero ang ila mga miyembro kag mahal sa gihapon ang mga pamasahe.
Ini ang kasunod sang reklamo sa Bombo Radyo nga mahal gihapon ang pamasahe sa tricycle bisan sobra sa allowed seating capacity ang ginapasakay sang mga driver.
Sa interview sang Bombo Radyo Bacolod kay Julio Borneo, ginpahayag sini nga indi matuod ang ginareklamo bangud may yara sang gindesignar nga dispatcher sa ila ginaparadahan agud masiguro nga tatlo lang ka pasahero ang masakay, santo man sa pagsulundan sang Barangay Sum-ag bilang pagtuman sa health protocol batok sa COVID-19.
Suno kay Borneo, kun may yara man sang naglapas sini kag mapamatud-an, may yara sang sanction nga atubangon ang driver.
Ginapasiguro man sini nga tatlo lang ang nagasakay sa tricycle kun maghalin sa ginapilahan.
Apang mahimo man nga magdamo man ang pasahero sa tion nga nagabiyahe na ini bangud sarang man ini nga madugangan kun may nagapara sa dalan.
Gani nagpanugyan ini sa mga pasahero nga nagareklamo nga overloaded ang tricycle nga kuhaan ini sang body number kag ireport sa Barangay Sum-ag agud mahatagan sang nagakaigo nga tikang.
Samtang, ginpahayag man ni Leo Suarez, isa ka driver sang STAD-TODAI nga matuod nga nagakarga sila sang apat ukon lima ka pasahero bangud kun kaisa naga-ayo man ang pasahero nga masakay ilabi na kun nagadali na ini apang ginsiguro lang nila nga may facemask kag faceshield ang mga ini.
Suno diri, P30 lang man ang ila nga sukot kada isa tubtob sa Barangay Tabunan, Bago City.
