Ginalantaw ni Vice Mayor El Cid Familiaran, pinuno sang inter-agency task force against COVID-19 sa Bacolod City nga pagkatapos sang patigayunon nga swab test sa mga vendors sa tatlo ka mayor nga merkado sa ciudad, posible nga ilift na ni Mayor Evelio “Bing” Leonardia ang lockdown diri kada Domingo.
Sa interview sang Bombo Radyo kay Familiaran, ginpahayag sini nga posible nga ilift na ang Sunday lockdown sa mga merkado sumugod Oktubre 18 kag magapatigayon lang ang City Disaster Risk Reduction Management Office sang disinfection kada Sabado agud hilway nga makabaligya ang mga vendors kun Domingo.
Naintindihan man sang bise-alkalde ang kahadlok sang mga vendors nga magpaswab test bangud sa posibilidad nga magpositibo ang mga ini, indi makabaligya sa sulod sang 14 ka adlaw, kag madulaan sang customer bangud sa impression nga may virus ini.
Apang luyag man sini nga maintindihan sang mga pumuluyo nga tinutuyo sa nasambit nga tikang amu ang kamayuhan sang bilog nga ciudad.
Nagalaom ini nga madamo ang mag-ugyon sa patigayunon nga swab test sa Sabado, Oktubre 10 kag ginarespetar man ang mga indi magpakigbahin apang santo sa polisa sang ciudad, suno diri, indi man sila gihapon makabaligya sa merkado.
Ginakalipay man ni Familiaran ang suporta nga ginpagwa sang napulo ka nagkalain-lain nga asosasyon lakip na diri ang mga Flower Venors, Manokan Country, Vendors Plaza, Burgos Market, Central Market, Libertad Market kag Fish Vendors sa programa nga gobyerno nga matapna ang virus.
