Na-overcharge nga laptop ang ginalantaw gintunaan sang sunog nga nagluntad sa Purok Masinadyahon, Barangay Pahanocoy, Bacolod City kagab-i.
Sa interview sang Bombo Radyo Bacolod kay Fire Superintendent Jenny Mae Masip sang fire marshal sang Bureau of Fire Protection – Bacolod, tatlo ang totally damaged kag isa ang partially damaged nga balay sa nasambitan nga sunog.
Ang balor sang kahalitan ang nagdangat naman sa P229,770.
Sa ila imbestigasyon, wala sang tawo ang balay ni Regina Pagunsan, ang ginhalinan sang sunog, kag mahimo nga sa pagbiya sa balay nabiyaan nga nakasaksak ang laptop tubtob nga ini ang nag-overheat.
Madasig naman nga naglapta ang kalayo bangod apisar semi concrete ang mga nasunog nga balay, kalabanan sa structures ang human sa light materials.
Mensahe naman ni Masip nga malikawan ang sunog pinaagi sa pagpractice sang basic safety kaangay sang pagkakas sang nakasaksak nga appliances kun magbiya sa balay, ukon kun wala ginagamit.
