P1.6 million ang ginabanta nga balor sang halit sa nagluntad nga sunog sa Purok Rosal, Barangay Zone 7, Talisay City kahapon sang aga.
Duha ka mga balay ang totally burned kag duha ang partially burned lakip na ang isa ka sari-sari store.
Sa interview sang Bombo Radyo kay Fire Officer 1 Kem Itchon, fire investigator sang Talisay City Fire Station, alas 6:22 sang aga sila nakabaton sang tawag gikan sa Talisay Disaster Risk Reduction & Management Office nga may yara sang nagluntad nga sunog sa nasambit nga area.
Ila ini nga ginrespondehan kag ila naabtan ang duha ka balay nga ginalamon sang kalayo.
Alas-7:05 sang aga sang gindeklarar nga fire out na ang sunog.
Ang sunog nagsugod sa puluy-an ni Priscilla Emnase, isa ka senior citizen.
Gintupok man sang kalayo ang balay ni Bebing Elisan samtang partially damaged ang grocery store ni Van Galaga.
Nakaangkon man sang gamay nga halit sa balay ni Rose Elisan bangud sa sunog.
Wala naman sang may napilasan ukon nasamaran sa insidente.
Nagdangat sa P1.620 million ang balor sang halit nga tuga sang nagluntad nga sunog.
Sa karun, padayon pa ang imbestigasyon kun ano ang ginhalinan sang kalayo.
