Nagdangat sa P18 million ang ginabanta nga balor sang halit nga ginbilin sang sunog sa Colegio de Sta Rita de San Carlos Inc., San Carlos City kapin alas 8:00 ang takna kagab-i.
Sa interview sang Bombo Radyo kay Fire Chief Inspector Rofeno Tanedo, fire marshal sang San Carlos City Fire Station, alas 7:14 kagab-i sila nakabaton sang report sang sunog, makaligad ang isa lamang ka minuto yara na naka-abot sa area ang mga ini.
Pag-abot, nagdeklarar sang first alarm ang BFP apang matapos ang 15 minutos nagdeklarar ini sang second alarm kag sa padayon nga pagdako sang kalayo sila na nagdeklarar sang third alarm.Alas 9:00 under control na ang sunog samtang alas 12:00 sang kaagahon amo ang pagdeklarar nga fire out.
Nag-abot man ang bumbero sang Calatrava, Toboso, Escalante kag Vallehermoso sang Negros Oriental.
Gintupok sang kalayo ang likod nga portion sa nawala nga bahin sang building.
95 percent nga sunog ang duha ka building samtang 90 percent ang isa.
Ila man gintinguhaan nga indi malab-ot sang kalayo ang simbahan nga katupad sang buluthuan.
Sa karun padayon pa ang imbestigasyon samtang on-going pa ang mapping operation bangod madamo sang nagkaladagdag nga mga debris.
Isa sa kabudlayan sang BFP amo nga sirado ang mga gate, piertahan kag grills sang buluthuan.
Apat naman ang narekord nga nag-agom sang minor injuries.
Ang Colegio de Sta Rita de San Carlos Inc ang isa ka catholic school kag sa karun indi pa makuhaan sang statement ang mga madre nga suno kay Tanedo nag-eksperyensya sang tuman kakibot sa natabo nga insidente.
