Electrical in nature ang nakita nga rasun sa sunog nga nagluntad sa Bacolod Central Market kahapon sang kaagahon.
Sa interview sang Bombo Radyo Bacolod kay Fire Chief Inspector Erwin Johannes Gimotea, head sang Investigation and Intelligence Section sang Bureau of Fire Protection Region 6, bangod government property ang nasunog, ang imbestigasyon ang gintake-over sang regional office.
Kahapon, sila ang nakatipon sang mga ebidensya nga nagapakita nga electrical in nature ang rasun sa sunog kag ini ang ginalantaw nga nagikan sa block number 237 tubtob 239 nga mga karenderia, bangod didto nakita ang mas madamo nga ebidensya.
Apisar nga wala pa matumod kun ano ang matuod nga rasun, isa sa ginalanaw nga na-overheat ang linya bangod sa ini ang overloaded na.
Suno diri, may load lamang nga ginarekomendar nga mahimo makarga sa isa ka linya apang bangod sa wire tapping ukon pagsugpon-sugpon sang linya paagi sa extension, wala na masarangan sang linya kag ini ang nasunog.
Paathag ni Gimotea nga atop lamang ang naislan sa merkado apang ang mismo nga structure ang halin pa sang 1940s.
Ini ang ginakonsiderar man sang BFP nga fire-prone.
Kahapon sang hapon, napahanugutan man nga makabalik ang mga market vendors nga wala maulamid sa sunog, samtang ginsarado naman ang nasunog nga area.
Pahanumdom na lamang ni Gimotea sa mga vendors nga mangin disiplinado kag sundon ang market rules.
