Ginalantaw nga ginhungod ang natabo nga sunog sa 7th Road, Barangay Taculing, Bacolod City kaina pasado ala-1:00 sang hapon.
Duha ka balay ang totally damaged samtang may isa naman nga partially damaged.
Sa interview sang Bombo Radyo Bacolod kay Jonard Masola, kaingod sang nasunog nga balay, ang kalayo ang nag-umpisa sa balay ni Edwin Tanghal, yara sa 35 tubtob 36 anyos.
Ginalantaw nila nga ginhungod ang pagsunog bangod nagaisahanon lamang si Edwin sa balay sang matabo ang insidente bangod nagabyahe sang tricycle ang iya nga amay nga si Edwardo Tanghal.
Samtang ang iloy nga si Angelie Masola, ang naga-upod naman sa iya bana bangod may trauma ini nga mabilin sa balay upod ang bata nga masami gina-abot sang nervous breakdown.
Suno kay Masola, masami nga nagasinggitan kag nagakumod-kumod si Edwin kag ini ang permi man nga may dala nga lighter apang may mga tion man nga ini ang maayo estoryahon.
Apang kaina, nabatian nila nga ini ang nagasinggitan kag kumod-kumod kag sa paggwa sini sa pyertahan ini ang hinali nga nagdalagan.
Wala naman nila nasundan si Edwin matapos makita nga nagakarab-karab na ang kalayo, gani sila ang nagbululigay na lamang sa pagpalong sang kalayo.
Natupok ang duha ka balay nga human sa light materials samtang naulamid naman ang kusina kag banggirahan sang isa pa ka balay.
