Kapin P300,000 ang ginabanta nga balor sang halit nga gintuga sang sunog nga nagluntad sa 6th Road, Purok Bayanihan, Barangay Taculing, Bacolod City kahapon sang aga kun sa diin nadulaan sang kabuhi sang mag-iloy nga si Mingel Itchon, 35-anyos, isa ka stroke victim kag apat ka tuig nga bata nga si Ariana Itchon.
Sa interview sang Bombo Radyo kay Bacolod City Fire Marshal Chief Inspector Stephen Jardeleza, natumod na nila ang balay nga hulot nga ginhalinan sang kalayo kun sa diin may yara sang isa ka kwarto kag gina-istaran sang isa ka tawo.
Suno sa iya, ginaverify pa sini ang pangalan sang nagaistar diri.
Suno kay Jardeleza, unattended cooking ukon napabay-an nga dapog ang gintunaan sang kalayo kag ginaproseso pa sang mga imbestigador ang mga ebidensya agud indi ang ma-establish.
Suno sa iya, sa inisyal nga data sang BFP, apat ka balay ang totally burned samtang duha naman ang partially burned apang ini ang subject pa sa dugang nga impormasyon.
Suno sa City Fire Marshall, bangud sa human sa light materials kag naga-alalangot ang mga balay, madasig nga naglapta ang kalayo.
