Kandila nga ginapahayag nasalapay sang kuring ang rasun kun ngaa natupok ang ginabanta anom ka balay sa Purok Paghidaet, Barangay Tangub, Bacolod City pasado alas-12:00 kaina sang kaagahon.
Sa interview sang Bombo Radyo Bacolod kay Alyas Ryan, tag-iya sang balay nga ginhalinan sang kalayo, nagbakwit ang mga ini sa Rodolfo A. Medel Sr. Elementary School bangod napalos ang atop sang ila balay.
Nagpabilin lamang ang iya iloy, tiyo kag tiya kag naghimo sang temporaryo nga atop sa porsyon sang ila balay agud may tawo sa ila nga balay.
Ang iya man nga tiyo ang nagsindi sang kandila agud sila ang may suga.
Apang suno kay Ryan, aksidente nga nasalapay sang kuring ang kandila kag nalab-ot sini ang butane cannister.
Naglupok ang butane, nga amo na ang gintunaan sang pagdako sang kalayo.
Suno kay Ryan, ginabanta sini nga yara sa anom ukon pito ka balay ang naulamid sa sunog.
Ginakasubo sini ng luwas sa naguba na sang Bagyo ang ila balay, ini ang ginlamon pa sang kalayo.
