Gin-athag sang fire marshal sa Bacolod City Fire Station nga electical in nature ang rasun sa nagluntad nga sunog sa Purok Paghidaet, Barangay 29, Bacolod City kahapon sang hapon.
Sa interview sang Bombo Radyo Bacolod kay Fire Chief Inpector Stephen Jardeleza nareport sa ila ang sunog alas-5:07 kahapon sang hapon kag nafire-out alas-5:54 sang hapon.
Nagdangat naman sa P1.8 million ang ginabanta balor sang kahalitan kun sa diin pito ka balay ang totally damaged samtang anom naman ang partially damaged.
Paathag ni Jardeleza nga mahimo lain ang ila nga numero kun ipaanggid sa Bacolod City Disaster Risk and Reduction Management Council (CDRRMO) bangod lain ang ila pinaagi sang assessment.
Sa imbestigasyon sang Bacolod City Fire Station, nakita nga nagikan sa balay ni Marites Logronio ang kalayo, apang ini ang yara sa service entrance sang balay kag indi kaangay sa mga alegasyon nga gindakop sang butane cannister ang spark gikan sa pagwelding.
Suno diri, may witness nga nagapuyo man sa balay nga nagpahayag nga una sini nakita ang kalayo sa service entrance pasulod sa ila balay.
Bilang suporta sa statement, may mga recoveries man sila sa lugar nga ila ipadala sa fire arson laboratory sa Bureau of Fire Protection (BFP) national headquarters.
Pahayag ni Jardeleza nga nakakita sila sang electrical arching sa fuse box sa idalum sang service entrance, nga nagapakita nga ginsaylo ang linya bangod sa ginapatigayon nga rennovations sa balay.
Bangod sa pagbag-id sang wire, amat-amat nga naupod ang insulation tubtob nga nakatuga sang spark kag nag-umpisa sang sunog.
