Ginsapote sang mga residente ang 24 anyos nga lalaki nga tuyo kuntani mangmotornap sang isa ka motorsiklo sa Bangga Cory, Barangay Taculing, Bacolod City.
Ang insidente ang natabo kapin ala-1:00 kahapon sang udto kun sa diin nakita sang isa ka bystander nga ginatulod-tulod sang suspect nga ginkilala nga si Willy Rapado ang itom nga Kawasaki nga motorsiklo sang pastor nga si Alyas Hermis Voronel Jr.
Matapos makita nga tuyo tabanon ang motorsiklo, ang suspect ang ginpululihan sang madamo nga mga bystander.
Ini ang nakaangkon sang pila ka samad kag ginbulong man sang Barangay Taculing Disaster Risk Reduction and Management Office.
Ginahulat pa sa karun ang desisyon sang pastor kun ini ang magapasaka pa sang kaso, bangod sa inisyal, ini ang kaangay nga naluoy naman sa suspect nga nasapote, kag wala man madayun ang tuyo nga motornapping.
