Kasunod sang malain nga tiyempo dala sang Tropical Storm Kristine pila sa mga Local Government Unit sa Negros Occidental kag ciudad sang Bacolod ang nagkanselar sang klase.
Ini ang ginlakipan sang Bacolod sa Pre School, Elemetary kag Senior High School; All Levels sa Isabela; San Carlos City; Murcia; Valladolid; San Enrique; Talisay City; Candoni; Moises Padilla; Silay City; Victorias; Toboso; Isabela; Himamaylan; Hinigaran; Sipalay; Pontevedra; Cauayan; Pulupandan; Calatrava; Pontevedra; Binalbagan, Salvador Benedicto; Cadiz, Manapla, Escalante City kag Sagay City sa preschool tubtob Senior High School.
Samtang ang probinsya sang Negros Occidental, nagpagwa sang data sang mga apektado sang pag-inulan bangud sa nasambit nga bagyo as of 5:00 PM kahapon.
Kun sa diin 316 ka pamilya, 166 ka indibidwal; duha ka ciudad kag walo ka Barangay.
Sa Evacuation naman 312 ka pamilya ukon 157 ka indibidwal ang yara sa sulod sang evacuation center samtang sagwa sang evacuation center ang apat ka pamilya ukon siyam ka indibidwal.
Walo naman ka lugar ang nabahaan kag wala man sang recorded nga casualty ukon nasamaran.
Tatlo ka balay ang naguba kun sa diin isa diri ang totally damaged kag duha ka partially.
Isa naman ka seaport ang nagsuspend sang sea trip samtang isa ka taytay ang narecord nga indi maagyan bangud pagsaka sang lebel sang tubig kag isa man ka LGU ang nadulaan sang supply sang kuryente.
Nagapabilin tubtob subong nga adlaw nga kanselado ang mga klase sa pre-school tubtob senior high school sa pampubliko kag pribado nga eskwelahan sa ciudad sang Bacolod.
Sang Lunes tubtob kahapon, Martes ginkansela man ni Bacolod City Mayor Alfredo “Albee” Benitez ang klase bangud sa nasambit tropical storm kag ini ang kasunod man sang rekomendasyon sang Bacolod City Disaster Risk Reduction Manage Office.
Sa interview sang Bombo Radyo Bacolod kay Atty. Caesar Distrito, spokesperson sang alkalde, luyag ni Bacolod City Mayor Alfredo Benitez nga mahatagan sang prayoridad ang seguridad sang mga estudyante.
Apang, paathag sini nga kun kaisa indi na kinahanglan pa maghulat sang anunsyo nga basta kun mabaskog ang pag-ulan mas maayo nga magdesisyon na lamang ang ginikanan nga indi na pagdal-on pa sa eskwelahan ang bata.
Pahayag ni Distrito, padayon ang pagpakig-angot sang alkalde sa mga Punong Barangay sa sitwasyon sa tagsa nila ka area of responsibility.
May yara naman sang nakapreparar nga mga food packs pananglitan nga kinahanglanon.
Samtang ang Department of Social Services & Development (DSSD) ang may nakahanda naman agud nga mahatagan sang bulig ang mga apektado sang pag-inulan dala sang Tropical Depression Kristine.
Nagapanawagan naman si Distrito sa mga Punong Barangay nga imonitoron ang mga residente nga ila nasakupan kag magpatigayon na gilayon sang preemptive evacuation sa tion nga kinahanglanon.
Sa karun ginabantayan sang ciudad ang forecast sang PAG-ASA kasubong agud mahibaluan kun magapatuman sang class suspension sa Hwebes.
