Ginpasalig ni House Deputy Speaker Dr. Janette Garin nga super majority sa House of Representative ang nagasuporta sa Anti-Dynasty Bill nga gin-author ni House Speaker Faustino “Bojie” Dy III, gani sa Senado na lamang ini kinahanglan nga mapasar.
Sa interview sang Bombo Radyo Bacolod kay Garin, nagalaom ini nga indi maglayo sa bersyon ni Dy ang hagna nga ipasar sang Senado.
Paathag sini nga ang sakop sang anti-political dynasty amo ang mga magpamilya nga politiko nga yara sa isa ka cluster.
Pahangop sini nga natunga sa clusters ang Provincial, Municipal, City, Baragay, Senado, House of Representatives, kag indi pwede nga may magkaupod sa isa ka cluster nga sulod sa 4th degree of consanguinity ukon tubtob sa magpaka-isa.
Halimbawa sini nga indi pwede nga may himata ang gobernador sa isa ka probinsya nga magasulod bilang board member, indi man pwede nga magpungko nga konsehal ang mga himata sang alkalde, kag ang Punong Barangay ang indi man pwede nga may himata nga magapapili sa pagka-Kagawad.
Apang paathag sini nga wala sang problema kun ang mga maghimata ang magapapili sa lainlain nga clusters.
Bangod super majority sa mga kongresista ang pabor sa hagna sang House Speaker, gani hulaton na lamang ang bersyon sang Senado.
Ini ang kinahanglan man nga mahatagan sang atensyon ilabi na nga gincertify ni President Ferdinand “Bongbong” Marcos Jr. bilang priority bill.
