Nagsulod na sa Philippine Area of Responsibility (PAR) ang Super Typhoon Inday kaina alas-3:00 sang kaagahon.
Ini ang ulihi nga nasiplatan sa 1,405 km sa nasidlangan sang Northern Luzon nga may kabaskugon sang hangin nga nagadangat sa 185 km/h, kag pagmadlos nga tubtob 230 km/h.
Ini ang nagahulag sa padulong sa nakatungdan nga dereksyon sa kadasigon nga 25 km/h.
Lauman nga ini ang magahuyang sa Typhoon Category sa Huwebes, samtang sa Biyernes, maekperyensyahan ang lapta-lapta nga pag-ulan sa bug-os nga pungsod tuga sang dala nga habagat nga pabaskugon pa sang Super typhoon Inday.
Ginpaidalom na sa Tropical Cyclone Wind signal no. 1 sa pila ka mga lugar sa Luzon partikular sa Batanes, Cagayan lakip ang Babuyan Islands, northern kag central portions sang Isabela, Apayao, nasidlangan sang Kalinga, naaminhan sang Aurora, kasubong man sa northern kag central portions sang Catanduanes.
Padayon naman nga nagaapekto ang southwest monsoon ukon habagat sa Mindanao.
Lauman ang lapta-lapta nga pag-ulan sa Zamboanga Peninsula, BARMM, Antique, Iloilo, Guimaras, Negros Occidental, Negros Oriental, Lanao del Norte, Sultan Kudarat, Sarangani, kag South Cotabato dala sang habagat nga ginpabaskog pa sang Bagyo.
Maeksperyensyahan naman ang tumalagsahon nga pag-ulan sa Palawan, nabilin nga bahin sang Visayas kag Mindanao dala gihapon sang habagat.
Samtang, sa Metro Manila kag sa nabilin nga bahin sang Luzon, lauman ang tumalagsahon nga pag-ulan tuga naman sang localized thunderstorms.
