Magapatuman na sang coordinated nga tikang ang Land Transportation Office, upod sa kapulisan, traffic enforcers kag local government units, angot sa mga nagapatigayon sang drag racing.
Sa interview sang Bombo Radyo Bacolod kay LTO-Negros Island Region Director Atty Jeck Conlu, ginapahanumdom sini nga indi exempted si Superman sa layi sa dalan.
Ini kasunod sang nagluntad nga aksidente sa new economic highway sa Prk Badiang, Brgy Sum-ag, Bacolod City sang Mayo 12.
Kun sa diin napatay ang 16 anyos, samtang pilason ang duha ka iban pa, matapos makabunggo sa truck ang tatlo ka nagapalumba-anay nga motorsiklo.
Pahayag sang mga nakakita nga naga-superman ang tatlo ka biktima agud mapadasig pa ang pagpadalagan sang motorsiklo.
Suno kay Conlu, indi lamang sa Bacolod-Negros Occidental Economic Highway (BANOCEH) ginahimo ang kaangay nga drag racing activities, kasubong man sa iban nga highways nga wala maayo sang pamalay.
Sila ang nagpatigayon na sang coordination meeting upod sa Philippine National Police, traffic enforcers, kag mga local government units nga may-ara sang dalan nga ginhimo race tracks.
Ginalauman sini nga maplastar na nila ang mga pagsulundan para sa mangin tikang antes matapos ang bulan sang Mayo.
Pahanumdom sini sa mga naga-engaged sa drag racing nga indi na hulaton nga maaksidente sa dalan, kag indi na hulaton nga madakpan, bangod sila ang hatagan sang dako nga penalidad.
