Ginkompirmar sang pinuno sang Quarantine Centers Action Team (QCAT) nga nagaumpisa na subong nga adlaw ang pagbulig sang national government sa syudad sang Bacolod sa away batok sa coronavirus disease 2019.
Sa interview sang Bombo Radyo Bacolod kay Councilor Renecito Novero nga nagtambong sa pagsinapol kahapon, magluwas kay Department of Environment and Natural Resources (DENR) Secretary Roy Cimatu, yara man si Presidential Assistant for the Visayas Michael Lloyd Dino, RIATF-Visayas deputy chief implementer Gen. Melquiades Feliciano, kag DOH-7 regional director Jaime Bernadas kun sa diin ginplastar ni Mayor Evelio Leonardia ang problema nga ginapangatubang sa COVID-19.
Suno kay Novero, naghatag sang 30 vials sang remdisivir nga bulong kag approved sang Food and Drug Administration (FDA) agud gamiton sa pagbulong sang COVID-19 patients sa syudad.
Suno kay Novero, ang vial sang bulong ang nagabalor sang P9,000-P10,000 kag indi makadali-dali bakal ang isa ka tawo kun wala sang reseta kag indi nagikan sa ospital.
Ginpahayag man sini nga may limitasyon man ang pagbakal sini gani indi makapagusto bakal kag may yara sang mga documentary requirement ang pagbakal sini.
Suno pa kay Novero, kulang pa sa karun ang supply sang nasambit nga bulong.
Suno pa diri, makapila man nagrequest si Mayor Leonardia nga madugangan ang ginhatag nga vial sang bulong matapos nga maghingyo si Medical Center Chief Dr. Julius Drilon sang Corazon Locsin Montelibano Memorial Regional Hospital sang vial agud idapat kay Punong Barangay Imelda Banguanga sang Barangay 2 nga nagpositibo man sa balatian.
Pagkatapos sang pagsinapol kahapon, ginpahayag ni Cimatu nga ang formula nga ila gingamit sa Cebu amu ang itugyan sa kada barangay nga pagpakigbato sa virus sa pagpamuno sang mga punong barangay.
Suno sa iya, ang average case sa Bacolod kada adlaw ang yara sa 30 samtang sadto sa Cebu, yara sa 350 ka mga kaso.
Sa karun suno diri, nagadangat na lang sa 10 tubtob 15 ang mga kaso kada adlaw sa Cebu.
Gani, kampante ini nga mas mahapos mapanubo ang kaso sa Bacolod sa bulig kag kooperasyon sang mga pumuluyo.
