Gin-athag sang officer-in-charge sang Office of the Provincial Veterinarian sang Negros Occidental nga bastante ang supply sang karne sang manok kag baboy sa probinsya sa maabot nga holiday season.
Suno kay Dr. Ryan Janoya, wala sang shortage sa maabot nga holidays ilabi na sa bulan sang Disyembre, bangud ginlauman na sang mga poultry integrators kag backyard hog raisers ang demand sa holiday season gani nagapati si Janoya nga na-adjust na sang mga ini ang ila nga produksyon.
Dugang pa sini nga apisar nga naapektuhan sang African Swine Fever (ASF) ang probinsya, santo sa ila nga monitoring may nagakaigo man nga supply para sa lokal nga demand sang karne sang baboy bangud indi man tanan nga local government units ang naapektuhan sang nasambit nga virus.
Ginpahayag man sini nga sa sur nga bahin sang probinsya, mas ginpadamo sang mga backyard hog raisers ang ila production.
Samtang, kun presyo naman ang pagahambalan, ginpahayag ni Janoya nga sa duha ka semana nila nga monitoring sa presyo sang manok, nagpabilin ini sa average nga P203 kada kilo samtang sa baboy ang may average price sa probinsya nga P311 kada kilo.
Dugang pa sini, bangud sa demand sa holiday season, ginapaabot ang gamay nga increase sa presyo sang karne sang manok kag baboy.
