Gin-athag sang Regional Corporate Communication Officer sang National Grid Corporation of the Philippines (NGCP) – Visayas nga nabalik na ang supply ang kuryente sa isla sang Panay alas-12:30 kahapon sang udto.
Sa interview sang Bombo Radyo Bacolod kay Michelle Visera, halin Enero 2 alas-2:19 sang hapon nagshutdown ang dalagko nga mga planta sang kuryente sa Panay nga nagtuga sang power interruptions, low voltage kag fluctuations partikular na sa Panay kun sa diin ang naglawig ang rotational brownout kag kahapon lang nakabalik.
Pahayag sini nga 400 plus megawatt ang nakuha nila nga supply gikan sa mga planta kag amo ang ila nga ginpadala sa mga Electric Cooperative sa Panay kalakip na sa Guimaras kag Boracay.
Dugang pa sini nga may mga generating plant man sa Negros island nga nag-augment sang kuryente padulong sa Panay.
Paathag ni Visera nga kun ano ang mabatun nila nga supply sang kuryente gikan sa mga power plant, amo man ang gilayon nila nga ginadistribute sa mga Electric Cooperatives.
Nahibaluan nga may 13 ka mga planta sang kuryente nga makit-an sa Panay, kag suno kay Visera agud mangin transparent sa publiko, ginapaskil nila sa social media site kun pila ang volume sang nabatun nga power supply gikan sa kada planta kada adlaw.// Apang nakadepende na sa mga Electric Cooperatives kun paano nila idistribute sa ila service area.
Aminado ini nga kalabanan sa ginsupplyan sang kuryente sa Panay sang nakaligad nga inadlaw amo ang mga urban areas nga mahimo agud indi magkaproblema sa mga pasilidad kaangay sang ospital nga nagakinahanglan sang kuryente, samtang ulihi naman nga nahatagan sang kuryente ang mga yara sa malayo nga mga lugar.
Pasalig naman sini nga hinali magshutdown ang mga planta sang kuryente sa Negros Island, mahimo man makakuha sang supply gikan sa mga power plant sa Panay ukon sa Cebu bangod sila ang interconnected.
Apang paathag man ni Visera nga kun tuman ka dako ang supply nga madula, bangod ang NGCP ang taga-balanse sa supply kag demand, indi malikawan nga mabatyagan gid ang konsumedor ang epekto sini.
Suno diri, ginabuksan ang breaker agud maproteksyunan ang mga appliances sa mga pamalay kag indi maguba ang system sang Electric Cooperative.
Pasalig sini nga ang NGCP, power plants kag mga Electric Cooperative ang nagabuligay agud makahatag sang bastante nga supply kag malikawan ang mga disruptions sa kuryente.
