Ginpahayag sang spokesperson sang National Grid Corporation of the Philippines for Negros Island nga nagbalik na sa normal ang sistema sang kuryente sa isla sang Negros kag Panay matapos ang asod-asod nga power interruptions humalin sang Huwebes tubtob kahapon.
Sa interview sang Bombo Radyo kay Michelle Visera, connected na ang dako nga mga power plants gani nangin normal na ang supply kag demand sang kuryente.
Suno diri, una nga nagikan sa producers ang kuryente dayon ini nga magalabay sa NGCP, sunod sini, ang kuryente ang ihatag na sa mga electric cooperatives kag amo nga mabaton na sang konsumedor.
Pahayag ni Visera, madamo sang gina-agyan ang kuryente antes ini mag-abot sa konsumedor, gani padayon pa ang imbestigayson kun ano ang rason kag kun diin naggikan ang problema sa power interruption.
Ila naman nakuha ang mga reports gikan sa mga power plants kag amo nga ginatun-an, kasubong man nga napasa na ang mga reports sa Department of Energy agud mapahibalo sa ila ang apat ka adlaw nga problema sa kuryente.
Ginklaro man sang tagpamaba sang NGCP nga wala sang kamatuoran ang nagalapta nga impormasyon nga maeksperyensahan sa kada adlaw ang Manual Load Dropping kag pahayag sini, wala ini sang may narekord nga power fluctuations antes pa man ang natabo sang Huwebes.
Samtang, ginpakigbahin man sini ang ongoing project sang NGCP, kun sa diin ang anay duha ka linya mangin apat na agud mas madako ang kuryente nga makalabay kun kinahanglan sang Negros kag Panay sang kuryente gikan sa Cebu.
Suno kay Visera, ila ginpreparar ang ini nga proyekto bangod nga nagasaka ang demand samtang naganipis naman ang supply sang kuryente.
