Supply sang tubig sa Bacolod, nagpanaog na sa 80 MLD

Ginpasalig ni Bacolod City Mayor Greg Gasataya nga nagapreparar ang Bacolod City Government matapos nga nagnubo na sa 80 million liters per day ang supply sang tubig sa ciudad.

Nahibaluan nga ang Ngalan Water Treatment Plant sa Barangay Granada ang nagaproduce sang 15 MLD nga tubig kada adlaw para sa syudad.

Suno kay Mayor Greg, naga amat-amat panaog ang supply sang tubig sa ciudad kun ipaanggid sang nakaligad nga tuig nga nagalab-ot 100 MLD.

Naglaum ang alkalde nga mamintenar lang ang supply sang tubig kag indi na magpana-og pa.

Samtang, ang Murcia Water Treatment Plant nga nagakuha sang tubig halin sa Sum-ag River sa Murcia nga may kapasidad nga 25 MLD ang ginapaabot nga makabulig sa pagsupply sang tubig para sa ciudad.