Gin-anunsyar sang Supreme Court nga ginpahanugutan sini ang request nga sayluhon ang kaso nga ginpasaka nga may kaangtanan sa pagpatay kay Negros Oriental Governor Roel Degamo sa Manila Regional Trial Court.
Paagi sa tweet sang mataas nga husgado, ang request ang ginhimo mismo ni Justice Secretary Jesus Crispin Remulla.
Madumduman nga si Degamo kag walo ka iban pa ang ginpatay sadto Marso 4 samtang 17 naman ang nasamaran bangud sa insidente.
Ginpasaka sang Justice prosecutors ang kaso nga murder kag frustrated murder batok sa mga akusado nga sanday Joric Garido Labrador; Joven Calibjo Javier, Benjie Rodriguez, Osmundo Rojas Rivero, kag 12 ka John Does sa Tanjay City Regional Trial Court.
Samtang, ang kaso naman nga illegal possession sang firearms, ammunition, kag explosives ang ginpasaka batok sa tatlo ka indibidwal sa Bayawan City Regional Trial Court.
Una na nga ginpahayag ni Justice spokesperson Mico Clavano nga ang pagsaylo sang ginpasaka nga kaso ang agud nga matapna ang bisan ano nga bias ukon prejudgement , kun may yara man sa lugar kun sa diin makita ang kagamo sa pulitika.
Ginpahayag man ni Remulla nga nadiskubrehan sang mga opisyales ang pattern sang impunity sa probinsya kasunod sang pagbisita sini sa haya ni Degamo.
Nagdeploy man ang Philippine Army sang dugang nga mga suldado sa Negros Oriental kasunod sang massacre agud masiguro ang pila ka bahin sang probinsya samtang ginalagas ang nabilin pa nga mga suspetsado.
Samtang, ginpahayag naman sang Philippine National Police nga imbestigaran sang mga ini kun ang police security detail ni Degamo ang absent gid man sang ini ang ginpatay.
