Nagpatigayon sang surprise clearing ang Bacolod City Legal Enforcement Team kag Bacolod City Administrator’s Office-Market Enforcement Action Team sa annex building sang Libertad Public Market bangud ginahimo nga libre nga tululugan sang pila ka mga pumuluyo.
Sa interview sang Bombo Radyo Bacolod kay Bacolod City Legal Enforcement Team Leader Retired Police Col. Levy Pangue, ginlunsyar ang operasyon kasunod sang mga nabaton nga reports gikan sa Libertad Market Vendors Association nga wala na ginbaligyaan ang mga stalls kag ginhimo na nga tululugan kag lugar sa paggamit sang illegal nga druga.
Suno diri, ang kutob sa ginhimo nga stalls ang ginpangguba sang Bacolod City Legal Enforcement Team.
Suno kay Pangue, kasunod sang clearing operation, ginlimpyuhan man ang nasambit nga building sang Bacolod Environment and National Resources Office (BENRO) kag Bacolod City Administrators Office bangud tuman kabaho ang lugar.
Ang mga basura kag mga higko sang tawo ang nagalapta lamang sa lugar.
Suno kay Pangue, sa karun temporaryo nga ginsarad-an ang annex building.
Nakadepende naman sa opisina sang Bacolod City Administrator kun ano ang himuon sa mga vendor nga gin-awardan sang stall apang wala man ang mga ini nagbaligya didto.
Suno kay Pangue, ayuon man sini sa ciudad nga mag-install nalang sang security guard agud nga hugot nga magbantay ang nasambit nga lugar.
