Nakanselar ang surveillance testing nga natalana para sa mga personnel sang Bacolod Traffic Authority Office bangod naalang-alang nga pagpreparar sang mga testing kit.
Madumduman nga sang Nobyembre 28 tubtub 29, nagpatigayon sang surveillance testing sa mga food delivery riders sa ciudad sang Bacolod kun sa diin 0.6% ukon apat lang ang nagpositibo gikan sa 544 nga nagpaswab test.
Suno kay Executive Assistant to the Mayor Ernie Penida, ginpahibalo ini ni Dr. Chris Sorongon, ang deputy medical for data analysis and assestment sang Emergency Operation Center (EOC) nga naalang-alang sila sa pagpreparar para sa surveillance testing.
Nagapahibalo man si Pineda nga naganubo na ang cases sang COVID-19 sa Bacolod apang ginaabiso sini sa pumuluyo nga indi magsalig ukon magkumpyansa bangod buhi ang virus.
Panawagan man sini nga padayunon ang pag-obserbar sang minimum health protocols agud nga indi malatnan sang COVID-19.
Pasalig naman ni Pineda nga nakaquarantine na ang apat nga nagpositibo kag ginapatapos nalang ang isolation.
Napatuman naman ang contact tracing sa mga nakaclose contact sa mga nagpositibo.
Samtang ginatun-an naman sang EOC kun padayunon pa ang surveillance testing sa BTAO nga may kabug-usan nga 426 ka personnel.
Kun madayon, pagasundon naman ang gintalana nga by batch nga schedule kun sa diin ang nagatrabaho kun aga ang magapaswab sa hapon samtang ang nagatrabaho naman sa hapon ang magapaswab sa aga.
Paathag ni Pineda nga kun magpabaya, magadako ang tsansa nga madamo ang malatnan sang balatian.
Pahanumdum sini nga sa pagpatigayon sang swab testing sa nagkalain-lain nga sektor, may yara gid sang nagapositibo gani magapabilin ang abiso nga pagsunod sa minimum health protocol makapatigayon man sang surveillance testing ukon indi.
