Ginahibalo pa ang motibo sa pagtiro-patay sa isa ka anay priso nga lalaki sa Lacson Extension, Brgy Singcang-Airport, Bacolod City alas 3:30 kahapon sang kaagahon.
Natumod ang biktima paagi sa himata sini nga nagpadulong sa punerarya kag siya ang ginkilala nga si alyas Jojo, 46 anyos, single, wala sang trabaho kag residente sang Prk Anin, Brgy Pahanocoy, Bacolod City.
Sa interview sang Bombo Radyo Bacolod kay Police Captain Sherwin Galupar, station commander sang Bacolod Police Station 8, sa imbestigasyon natukiban nga sa nasambit nga tion ang biktima ang may katransaksyon ang wala natumod nga suspetsado sakay sa motorsiklo kag hinali nalang ini nga gintiro.
Ginalantaw nga anum ka beses ini nga gintiro bangud may na-recover ang operatiba sang Scene of the Crime Operation (SOCO) nga anum ka basiyo sang bala.
Matapos ang krimen ang wala makilal-an nga suspetsado ang nagpalagyo padulong sa bahin sang Barangay Alijis.
Suno diri, gilayon man sila nagtawag sang SOCO kag medical responder apang gindeklarar nga wala na ini sang kabuhi ang biktima.
Nagpatigayon man sila sang dragnet operation agud nga madakpan ang suspetsado.
Ang biktima ang anay priso kag may yara pa sang ginapangatubang nga mga kaso.
May nakuha man diri ang mga kapulisan nga armas-luthang.
Wala pa sang natumod nga persons of interest kag padayon pa ang imbestigasyon kag backtracking sang mga kapulisan.
