Ginpanginwala sang 23 anyos nga tiyo sa Cadiz City, Negros Occidental nga ginhimuslan sini ang 13 anyos nga hinablos niya sa pakaisa sang Nobyembre 11.
Nahibaluan nga priso subong sa Talisay City Police Station si Marlon Beboso Jr. matapos ginserbehan sang warrant of arrest sa lain nga kaso sang rape nga iya nakomiter sa Barotac Viejo, Iloilo.
Sa interview sang Bombo Radyo kay Marlon Beboso, nagpanindugan ini nga wala sang kamatuoran ang akusasyon nga ginhimuslan niya ang 13-anyos nga hinablos sa pakaisa.
Suno kay Beboso, duha ka adlaw ini nga nagtinir sa balay sang iya nga pakaisa sa Brgy. Magsaysay kag manugpauli na siya kuntani sang nag-angkas ang iya nga hinablos sa motorsiklo para idul-ong sa eskwelahan.
Ginpahayag sini nga natumba ang motorsiklo nga iya ginamaneho kag naghagmak ang nawong sang bata sa bato.
Bangud madamo ini sang dugo, naglakat si Beboso agud mangayo sang bulig apang nabatian sini ang alegasyon nga ginlugos niya ang bata pila ka oras pa lang ang nakaligad gani wala na ini nagbalik bangud sa kakulba.
Nagpadulong siya sa iya nga abyan sa Talisay para magtinir apang suno sa iya, wala siya nagkadto diri agud manago kundi para panilagan kun ano ang lakat sang iya nga kaso.
Aminado naman si Beboso nga may yara siya sang pending nga kaso sa Iloilo sa paghimulos sa iya nga barkada sang ini ang 14 anyos pa lamang apang suno sa iya, yara sa impluwensya sang illegal nga droga.
Masobra duha ka adlaw nga nagtinir sa siyudad sang Talisay ang 23 anyos nga tiyo nga gina-alegar naghimulos sa iya 13-anyos nga hinablos nga nagapakadto sa eskwelahan sa Cadiz sang Nobyembre 11.
Sa interview sang Bombo Radyo kay Andres Cepida, utod sang abyan nga gin-istaran ni Beboso, ginpahayag sini nga duha ka gab-i nga nagtulog ang suspetsado sa balay sang iya nga magulang nga si Boyet.
Suno kay Cepida, nagkilalahay ang iya nga magulang kag si Beboso bangud may yara sang ginabaligya nga bulong ang suspetsado kag ini ang ginadul-ong niya sa balay ni Boyet.
Gindugang niya man nga wala sila nakahibalo nga may yara siya sang kaso gani gintugutan ini sang iya nga magulang nga magtinir sa iya nga puluy-an.
Apang kahapon suno sa iya, nagpahibalo si Boyet nga magpalagyo ini bangud ginapahog siya sang suspetsado nga pagapatyon kun ini ang manugid sa mga pulis nga sa ila siya nagapuyo apisar wala sila kabalo sang rason kun ngaa ini ang nagapanago.
Suno sa iya, kahapon lang nila nahibaluan nga may yara sang kaso nga ginapalagyuhan si Beboso.
Gindugang niya man nga may yara ini sang upod nga babayi nga menor de edad sang ini nagtinir sa balay ni Boyet kag suno sa iya, may deperensya sa panghuna-huna ang nasambit nga babayi.
