Nadakpan na ang suspek nga nagtiro-patay sa isa ka family driver sa St Vincent, Barangay Alijis, Bacolod City kahapon sang hapon, September 1, 2026.
Ginkilala ang biktima nga si alyas Roger nga residente sang nasambit nga lugar, samtang ang suspek amo si alyas Budoy nga naaresto sa Gardenville subdivision, Barangay Tangub, Bacolod City kasunod sang ginpatigayon nga hot pursuit operation sang mga kapulisan.
Sa interview sang Bombo Radyo Bacolod kay Police Captain Jay-R Reyes, Officer in Charge sang Bacolod Police Station 7, matapos ang shooting incident ginmanduan sini gilayon ang intelligence team sini nga magpatigayon sang hot pursuit operation agud nga madakpan ang suspetsado nga nagtiro-patay sa family driver.
Suno kay Reyes, wala naman nagbato pa ang suspetsado sang ini ang nadakpan sang mga kapulisan apisar nga una nagaduha-duha pa ini nga magsungka.
Suno sa station commander, priso sa Bacolod Police Station ang suspek kag murder ang ginalantaw nga ipasaka nga kaso subong nga adlaw paagi sa inquest proceedings.
Daan nga hiligut-anon ang ginalantaw nga motibo sa krimen bangud may mga nagliligad na nga pagbaisay sa tunga sang biktima kag suspect
