Nakuha na ang naglubong nga bala sa abaga sang gintiro nga traffic enforcer sa Sitio Wayang, Barangay 3, Himamaylan City, Negros Occidental sang Biyernes sang gab-i, Septyembre 12, 2025.
Ginkilala ang biktima kay Alyas Novo, lalaki, kasado kag residente sang Sitio Wayang, Brgy 3, Himamaylan City.
Sa interview sang Bombo Radyo Bacolod kay Police Lt Col. Anthony Grande, hepe sang Himamaylan City Police Station, nagapadayon sagihapon ang ila nga imbestigasyon sa kaso kag may nabaton man sila nga impormasyon nga may look-out ang suspek apang subject for confirmation pa.
Suno kay Grande, wala pa nila naestorya ang biktima bangud yara pa ini sa hospital.
Ginpahayag man sini nga ang pamilya ang magaestorya sa ila sa tion nga makagwa na ang mga ini sa ospital.
May ginalantaw man sila nga persons of interest kag indi pa nila ini maestablisyar kun may ebidensya nga maangot nga ini ang may kahilabtanan sa krimen.
Madumduman nga gintiro ang biktima sang wala pa makilal-an nga suspetsado samtang nagahigda sa folding bed sa extension sang ila puluy-an.
Nakaangkon sang igo ang biktima sa tuo nga bahin sang iya dulunggan, nawala nga abaga kag natuo nga bahin sang iya liog.
Gilayon naman nga gindala sa ospital sa nasambit nga ciudad ang pilason nga biktima apang ginrefer ini sa Bacolod City.
Sa karon, nagapadayon ang imbestigasyon sang mga otoridad sa nagluntad nga insidente.
