Patay ang 27 anyos nga lalaki nga ginluthang sa Purok Langis, Barangay Banago sa ciudad sang Bacolod, kahapon sang hapon, September 27.
Ginkilala ang biktima kay Faustino Rojo, 27 anyos kag residente sa nasambit nga lugar.
Kahapon, nagalakat ang biktima sang ginsundan sang mga suspetsado kag gintiro sang makapila ka beses.
Ang biktima ang nakaangkon sang pilas sa likod nga naglusot sa dughan.
Ginhingagaw pa sakay sa tricycle ang biktima agud madala sa ospital kun sa diin ginrevive pa ini apang wala na matabangan pa.
Nakita man sang mga residente ang suspek kag ginapahayag nga indi pamilyar sa ila.
May mga bata man nga nakasaksi sa natabo sa biktima.
Samtang nakita man sa lugar sang insidente nga may naglubong nga bala sa pader.
Sa interview sang Bombo Radyo Bacolod kay Police Captain Rondyl Tapang, station commander sang Bacolod City Police Station 3, natumod na ang suspetsado nga nagtiro kay Rojo apang padayon pa ang ginapatigayon nga manhunt operation sa suspek nga residente man sang Barangay Banago.
Suno kay Tapang, isa lang ang suspek sa nagluntad nga shooting incident.
Suno sa station commander, may yara sila sang impormasyon nga nasal-an lamang ang biktima apang nagapadayon pa ang ila nga imbestigasyon sa kaso agud nga matumod ang motibo sa pagpangluthang
