Natalana nga pasakaan sang kaso ang natumod nga suspek sa pagtiro-patay sa isa ka security guard sa Barangay Handumanan, Bacolod City.
Madumduman nga ang biktima ang ginkilala nga si Arnold Caballes, 37 anyos, tumandok sa ciudad sang Kabankalan apang siyam ka tuig na nga nagapuyo sa Purok Ilaya, Barangay Cabug, Bacolod City, kaupod ang iya live in partner.
Una na nga ginpahayag sang kalive in sang biktima nga si Dholly Malalu-an, nga may yara sang ginsugo si Caballes para mag-utod sang kahoy kag ang naesturyahan amo nga 20 ka puno lamang ang tapson apang naubos ang 28 tanan ka mga kahoy.
Bangud sini, nagpangakig si Caballes tubtob nga nagbaisay sila sang iya ginsugo paagi sa messages.
Samtang, sang tinalikdan nga semana may isa pa gid ka nakabais si Caballes nga katapo sang Civilian Armed Forces Geographical Unit (CAFGU) nga nagamensahe kay Malalu-an.
Apang suno kay Malalu-an wala sini makaagi ginreplyan ang CAFGU kag sang si Arnold ang nakakita sang message, siya mismo naghambal sa CAFGU nga magpalayo sa ila.
Si Caballes ang anay suldado apang nag-untat na ini kag wala na nagbalik pa sa serbisyo.
Samtang, sang ginapakita naman sa witness ang CCTV video sa paglabay sang suspek didto natumod nga ang nakaaway sini sa transaksyon sang kahoy ang suspetsado.
Apang sa hot pursuit operation nga ginpatigayon sang Bacolod Police Station 10, wala na sa ila puluy-an ang suspetsado bangud nagpalagyo ini sa wala mahibaluan nga direksyon.
Suno kay Bacolod Police Station 10 commander Police Captain Glenn Montaño, natumod na nila ang motibo sa pagpatay sa biktima kag ini ang personal grudge bangud man sa panaysayon sang kalive in sang biktima.
Suno kay Montaño, ginadihon na sang mga ini ang mga papeles agud nga mapasakaan sang kaso ang natumod nga suspetsado sa nagtiro-patay kay Caballes.
