ala pa gihapon madakpan ang gina-alegar suspect sa pagluthang-patay sa isa ka trisikad driver sa Purok Langis, Barangay Banago, Bacolod City kahapon sang hapon.
Madumduman nga ang biktima ang ginkilala nga si Faustino Rojo, 26 anyos, trisikad driver kag residente sa nasambit nga lugar.
Kahapon, nagalakat ang biktima sang ginsundan sang suspetsado kag gintiro sang makapila ka beses.
Ang biktima ang nakaangkon sang pilas sa likod nga naglusot sa dughan.
Sa interview sang Bombo Radyo Bacolod kay Police Captain Rondyl Tapang, station commander sang Bacolod Police Station 3, madamo sang nakakita sa pagpangluthang kag nakilal-an man sang mga witnesses ang suspect bangod ini ang residente man sang Barangay Banago.
Ang suspect ang ginkilala lamang nga si Alias Alfonso.
Suno kay Tapang, ginkadtuan na nila ang balay sang iloy ni Alfonso kag kun diin ini masami makita, apang wala ang suspect.
Ginapahayag naman sang mga pumuluyo nga mahimo mistaken identity ang natabo bangod gina-alegar nga may naghampak sang bato sa suspect sang aga.
Ang description sang naghampak sang bato ang kaangay naman kay Rojo, gani ginalantaw nga siya ang nabaslan sang suspect.
Apang sa pihak sini, gina-imbestigaran man sang kapulisan ang background sang duha nga mahimo makatudlo sa motibo sang krimen.
Si Rojo ang natumod nga napriso na sadto may kaangtanan sa illegal nga droga.// Samtang ang suspect ang napriso naman bangod sa illegal nga droga kasubong man sa paghupot sang illegal nga armas-luthang.
