Duha ukon masobra pa ang ginalantaw nga suspect sa pagmassacre sang pamilya sa Sitio Guinam-an, Barangay Buenavista, Murcia, Negros Occidental sang Hwebes sang gab-i.
Ang mga biktima ang ginlakipan sang amay nga si Neldy Celayes, 59 anyos, iloy nga si Josephine Celayes, 60 anyos kag ang ila bata nga si Jovie Celayes, 33 anyos.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station, ginabacktracking pa nila ang mga background sang pamilya kag tubtob sa karun wala pa sang nagpalapit nga nakawitness sa brutal nga krimen.
Apang sa pagsugilanon sa mga himata, yara sa posible nga motibo ang land dispute ukon away sa duta.
Nahibaluan nga ila mismo ang duta nga natukuran sang ila balay kasubong man ang uma, apang ang pamilya ang nagatrabaho man sa kampo sang iban.
Sa karun may inisyal na sila nga paghinun-anon sa pamilya, apang nag-ayo ang mga ini nga luyag anay maasikaso ang haya kag lubong sang ila ginkanan kag utod.
Sa karun wala pa sang ma-establish gid nga motibo gani wala paman sang persons of interest, kag yara pa sa stage sang pagpangusisa.
Indi man ang mga ini informant sang militar bangod wala man sang namonitor nga presensya sang makawala nga grupo sa area.
Sa inisyal, nagapati si Fernandez nga duha ukon masobra pa ang suspects bangod indi mahimo sang isa lamang ka persona ang brutal nga pagpatay sa tatlo.
Nakarecover man sang basiyo sang Cal. 45 pistol kag basiyo sang Col. 357 nga lunsar short firearms sa crime scene.
Nakitaan naman sang mga samad sa ulo ang tatlo ka biktima, apang ginahulat pa ang official result sang post mortem examination sang scene of the crime operation (SOCO).
