Yara sa gihapon sa Bacolod Police Station 5 ang suspect sa paghimulos sa 16 anyos nga nga resulta sa pagpatay kay Nicus Balagosa sa Barangay Granada matapos nga ini ang nasal-an sa krimen.
Madumduman nga si Nicus Balagosa ang ginluthang patay sa sulod sang ila kwarto sa atubang sang iya mga ginikanan sang suspect nga si Carlito “Dondon” Tongho Jr.
Si Tongho ang amay sang 16 anyos nga babayi nga gina-alegar ginlugos sang duha ka abyan ni Nicus nga sadto 17 kag 19 anyos.
Sang Martes sang gab-i, Marso 11, natigayon nga naaresto ang isa sa mga suspect sa pagpanghimulos nga sa karun 20 anyos na, matapos serbihan sang warrant of arrest sa Muntinlupa City.
Si Alyas Paulo ang Top 2 Most Wanted Person sa Police Regional Office 6, Top 7 sa Bacolod City Police Office kag Top 1 sa Bacolod Police Station 5.
Samtang si Alyas Paulo lamang ang subject sa warrant of arrest.
Aminado si Alyas Paulo nga iya pangalan ang yara sa arrest warrant apang padayun sini nga ginpanginwala ang krimen.
Sa karun ini ang yara pa sa Bacolod Police Station 5 kag wala pa maturn-over sa Bureau of Jail Management and Protection.
Sa pihak nga bahin, padayun man ang pagpangita sang kapulisan sa duha ka suspect sa pagpangluthang kay Nicus.
Madumduman nga magluwas kay Tongho, kalakip man sa ginkasuhan sang murder ang iya utod nga kaupod sini sa paghimo sang krimen, kag may ara pa sang tatlo nga nagserbe lookout apang wala makilala.
Wala na nagpagwa pa sang dugang nga detalye si BCPO Director Joeresty Coronica tuhoy sa duha ka suspect, agud indi mahamper ang ginapatigayon nga imbestigasyon.
