Dumot ang ginalantaw nga rasun sa natabo nga pagtiro-patay sa isa ka anay priso sa Prk Sigay, Brgy Singcang-Airport, Bacolod City kagab-i; samtang padayun man nga ginalagas sang kapulisan ang suspect.
Ang biktima ang ginkilala nga si Roberto Santocildes alyas Berto, 56 anyos, kasado, tumandok sang Brgy Talacagay, Hinobaan.
Sa interview sang Bombo Radyo Bacolod kay Police Captain Sherwin Galupar, station commander sang Bacolod Police Station 8, may-ara na sila sang suspect apang sa karun ini ang wala pa nila ginhingadlan sa kahanginan.
Ginpahayag sang eyewitness, nga sulpak ang gamit sang suspect sa pagpatay.
Suno diri, old grudge ang isa sa motibo nga ginalantaw nila rasun sa pagpatay.
Sa imbestigasyon, gintiro si Berto samtang ini ang yara sa makeshift nga duyan, kag ini ang naigo sa dughan.
Wala na sang kabuhi ang biktima sang maabtan sang medical responders.
Gilayon man sila nga nagpatigayon sang manhunt operation agud madakpan ang suspect.
Nagalaom ini nga madakpan gilayon ang suspect kag mapapanabat sa krimen nga ginhimo.
