Ginahulat pa gihapon sang amay ni Nicus Balagosa nga madagdagan na sang warrant of arrest ang mga suspetsado sa pagluthang-patay sa iya bata sa Granada Heights, Barangay Granada, Bacolod City.
Madumduman nga ang 16 anyos nga bata nga babayi sang suspect nga si Carlito ‘Dondon’ Tongho Jr. ang gina-alegar ginhimuslan sang 17 kag 19 anyos nga abyan ni Nicus.
Apang matapos makastiguhan ang duha ka suspetsado sa paghimulos kag wala na nakapakita, si Nicus ang ginsulong ni Tongho upod sa iya utod kag duha ka iban pa kun sa diin ginsulod sini sa kwarto ang biktima kag ginluthang sa atubang sang iya mga ginikanan.
Ginkumpirmar man sang dalagita nga indi kabahin si Nicus sa naghimulos sa iya.
Sa interview sang Bombo Radyo Bacolod kay Eric Balagosa, adlaw adlaw sila gihapon nga nagakalisod bangod wala pa mahatag ang hustisya.
Aminado naman ini nga sila ang ginbuligan sang kapulisan sa pagfile sang kaso nga murder apang tubtob sa karun sila ang nagahulat pa kun san-o maraffle ang kaso.
Gin-paathag naman ni Police Lt. Col. Joery Puerto, head sang Investigation and Detective Management Unit sang Bacolod City Police Office (BCPO), yara lamang sa Bacolod City ang mag-utod nga Tongho kag ginamonitor nila ang kada hulag sang mga ini.
Apang indi naman nila mahimo matandog ang duha tubtob nga wala pa sang warrant of arrest.
Pahanumdom sini nga ginakabig nga armed and dangerous ang status sang mga suspect bangod sila ang nagahupot sang armas-luthang.
