Nadakpan pinagi sa gun buybust operation ang suspect sa pagpatay sa 13 anyos nga dalagita sa Sitio Lawagon, Brgy Poblacion West, Candoni, Negros Occidental sang Abril 27 sang gab-i.
Madumduman nga ang biktima ang ginkilala nga si Alyas Rica, residente sang Prk Pag-ulinganan, Brgy Haba, Candoni.
Sa interview sang Bombo Radyo Bacolod kay Police Captain Leonel Adolacion, acting chief of Police sang Candoni Municipal Police Station, gin-aresto nila ang 41 anyos nga suspetsado, nga isa ka tapasero sang tubo, sa ginpatigayon nga gun buybust operation bangod sa reports sa paghupot sini sang illegal nga armas, nga paglapas sa Republic Act 10591 ukon Comprehensive Firearms and Ammunition Regulations Act.
Sa pagdala sa Police station, didto na nag-ako ang suspect nga siya man ang nagpatay kay Rica.
Suno kay Adolacion, may witness naman nga una nga nakatudlo nga ang suspect ang ulihi nga nakita nga kaupod sang dalagita.
Sa karun, padayun pa nga ginahulat ang resulta sang autopsy examination, agud matumod gid ang rasun sang kamatayon sang biktima.
Ang suspect ang nahibaluan nga kaingod lamang sang balay sang dalagita.
Suno sa iya ginhagad sini biktima nga makighilawas, apang ini ang nagabato kag nagapahayag nga manugid sa amay gani ini ang iya nga ginkuga.
Matapos malipongan, didto na sini ginlampusan sang bato ang ulo sang biktima, kag ini ang wala na niya matandog.
Padayun man ang panawagan ni Adolacion sa iban pa nga mahimo nakawitness nga magpakita man kag magbulig agud mapabaskog pagid ang ifile nga kaso.
