Ginkumpirmar sang city director sang Bacolod City Police Office nga napasakaan na sang kaso ang suspek nga nagpatay sa negosyante nga si Engineer Romie Li.
Madumduman nga si Li ang gintiro sa Bacolod Downtown area, Bonifacio St, Barangay 12, Bacolod City sang tinalikdan nga bulan sang Setyembre.
Suno kay BCPO Director Police Col Joeresty Coronica, napasaka na ang kaso sang Biyernes batok kay alyas Alan apisar nga wala naghatag sang affidavit ang pamilya.
Ginhulat man nila sang pila ka semana ang pamilya apang wala gid maghatag sang affidavit.
Suno kay Coronica, wala na sang mga ini ginhibalo pa ang rason kun ngaa wala naghatag sang affidavit sa pagpasaka sang kaso.
Ginpahibalo na lamang nila ang abugado sang pamilya, nga ang mga kapulisan na mismo ang magapasaka sang kaso.
Suno sa BCPO Director ang mga pulis ang mahimo nga magpasaka sang kaso sa mga nakakumiter sang murder.
May yara man sila sang duha ka mga witnesses kag nakakilala sa suspetsado.
Ang kaso batok sa suspek ang napasa na sa opisina sang prosecutor.
Suno kay Coronica mahimo na nga madakop ang suspek bisan diin pa ini bangud napasaka na ang kaso kag may nadagdag na nga warrant of arrest.
Nagapati ang kapulisan nga wala sa ciudad sang Bacolod ang suspect bangod kun ini ang yara sa ciudad, nadakpan na ini sang kapulisan bangud sa existing warrant.
